بجــــم
Posted by Bullet | Labels: إنـو العمى | Posted On Sunday, October 10, 2010 at Sunday, October 10, 2010
في مرة من المرات كنتو بتحسو بحمااس وبعدين قابلتو حدا وبردتو ! في مرة من المرات كنتو متفائلين وبعدين شفتو شي وضربكن التشاؤم على حين غرة ! في مرة حسيتو أنو أنتو مجانين ورحتو ع شي مطرح و اكتشفتو انكن انتو العاقلين و الراكزين !
أنا اليوم بصراحة بردت و تشائمت و اكتشفت نسبة العقل اللي الله انعم فيها عليي !
أنا عندي سؤال وياريت اللي بيقرأ هالبوست يتصدق علي بإجابة .. كيف الطلبة بالجامعات بيطلعو بس بتخلص محاضراتهم ؟ يعني بس الواحد أو الوحدة بتخلص وبدها تمشي ع البيت كيف بتطلع من بوابة الجامعة ؟!
عنجد بسأل وبدي إجابة !
أنا راح احكيلكم كيف أخرج من بوابة " الجامعة المقدسة " !
طبعاً الواحد ع آخر محاضرة بيكون هلكان وأخلاقو بمناخيرو وبدك تطلعي ع البيت متل الصاروخ .. بس بسبب حالات التخلف اللي بنعاني منها هون بتصير شغلة الخروج من هالبوابة من الأحلام !!
ليش؟ .. لأنو لازم تقطعي ال 50 خريفاً للمبنى التاني و بتطوفي عليه لتلاقي المكتب المنشود .. بس بهيك حالات بتلاقيه بسرعة , كيف؟ من ريحة التجمع اللي بسبب الجو الربيعي + صوت الصريخ = بتعرفي الغرفة بسرعة !
بتروحي بتسالي عن هالمعمعة اللي صايرة فبيخبروكِ أنو لازم تأخدي " تصريح " !!
أنت طبعاً بعدها أخلاقك بمناخيرك فبتقطبي حاجباكِ و بتحاولي تستفسري أكتر فبيخبروكِ أنو هالـ" التصريح" عبارة عن ورقة بيكون مكتوب فيها أسمك و رقمك الأكاديمي + إسم سائق الباص اللي بتطلعي معو ورقم بطاقتو الشخصيةليشوفها السكيورتي يلي ع بوابة الجامعة ليصير فيكِ تضهري .. وبدك كل يوم تدخلي ع جهنم و بتنضغطي من هالزحمة و بتمتمي بكلمات كفرية كل يوم و بتطلعي ونص ملابسك مفقودة وبيضربك الصرع مشان بالآخر تأخدي هال" تصريع " !!
قال ليش ؟ مشان نضبط حالة فلتان بعض البنات اللي بيطلعو من الجامعة وبيصيعو !
ان شاء الله مفكرين أنن راح يلموا اللي بيفلتو كل يوم ! اللي بدو يفلت والله العظيم بيعملها وهو جالس قدام عيونك .. يعني مش محتاجين كل هالخزعبلات والتصاريع !
المشكلة أنو يلي بالجامعة فوق ال 1435934533 بنت وكل وحدة لازم تأخد هالورقة وبينطروك شي ساعة بس تخلص الأوراق ليروحو يصوروا نسخ زيادة !!!
وحياة الله بدي حدا يصنفلي هالبشر , من أي نوع هنّ ؟؟؟
أنا اللي قاهرني أنو ليش يعني مابيخلونا نسوق ونريح راسنا ! ولا هيدا كمان حرام و سيجلب مفاسد كثيرة !! الناس طلعت ع القمر و هن مانعين البنات يسوقوا .. هالقد حريصين ع الدين يعني ! بيحسسوا الوحده أنو هي أخبث من إبليس و شو ما عملت يعني هيك أو هيك هي بجهنم ! يا حبيبي إذا أنت فلتان و الغلط لابسك من راسك لساسك هيّ مشكلتك ضبّط وضعك , عالج عُقدك بالأول .. أما أنك بدك تيجي تخنق دينا بمواعظك و خطبك وبدك " تلم بنات المسلمين " بالأول لّم زبالتك وهن يلي محتاجين " تصاريح " مش نحنا ...
طبعاً هون لتجاهدي في سبيل العلم وبما أنو السواقة ممنوعة فبتضطري تدوريلك ع باص هيك محترم بيوصلك ع الجامعة كل يوم وبنهاية الشهر بتأخدي كيلو من مصاريك وبتدفعيها !
طبعاً هالأجرة نفسها سواء رحتي أسبوع نفسها , سواء تأخر عليك هي نفسها, سواء خلصتي محاضراتك ونطرتيه 3 ساعات ليشرف ويجي كمان هي نفسها ! بيمصوا دمك مص ! وينو وينوو اللي بيحكي عن الدين والأخلاق وينوووو ؟؟ .. أو بس يلي راح يفسد أمة محمد فروج النساء وكيدهن !
طبعاً أنا أول يوم داومت بشنتاية أختي لأنو صغيرة وهيك – أنا لست من حاملات الحقائب يعني لو عندي مصاري والموبايل بحطون بجيبتي و صلى الله وبارك _ المهم وبسبب هالـ" تصريح" شوفو شو صار فيها ..
أنا عنجد كنت بجهنم وطلعت !هلاء أنا الحمدالله طلعت سليمة بس من بعد ماتشوفها أختي مابتوقع أزمط من بين إيديها هههههه